ភ្នំមួយនៅស្រុកទឹកឈូ ខេត្តកំពតត្រូវបានឈ្មួញទុច្ចរិតកាយរំលាយ យកដីទៅលក់ដោយខុសច្បាប់ ។
បើតាមសម្តី និងព័ត៌មានចេញពីអតីតជំទប់ទី១នៅឃុំកណ្តោល ស្រុកទឹកឈូ ខេត្តកំពត មកពីគណបក្សសង្គ្រោះជាតិសុំមិនបញ្ចេញឈ្មោះបានផ្តល់ព័ត៌មានមកថា រឿងរ៉ាវនេះបានកើតឡើងតាំងពីមុនការបោះឆ្នោតឃុំ-សង្កាត់មកម៉្លេះ ដោយមេឃុំកណ្តោល ស្រុកទឹកឈូ ខេត្តកំពត រួមទាំងស្មៀនឃុំផងដែរ បានអនុញ្ញាតិ និងចូលដៃចូលជើងជាមួយឈ្មួញទុច្ចរិតមួយក្រុម បានកាយរំលាយភ្នំយកដី ឬថ្មទៅលក់ដើម្បីប្រយោជន៍ផ្ទាល់ខ្លួន និងបក្សពួកខ្លួន ។ អតីតជំទប់ទី១បានប្រាប់បន្តទៀតថា កាលខ្លួននៅបំពេញការងារជាជំទប់ទី១ខ្លួន និងក្រុមការងារបានចុះទៅដល់ទីកន្លែងភ្នំនោះដោយផ្ទាល់ដើម្បីដោះស្រាយ និងសម្របសម្រួល ហើយធ្វើកិច្ចសន្យាថាមិនឲ្យមានការកាយរំលាយភ្នំបន្តទៀតឡើយ ។ តែអកុសល នៅពេលដែលគណបក្សសង្គ្រោះជាតិត្រូវបានរបបលោកហ៊ុន សែនរំលាយចោលកាលពីថ្ងៃទី ១៦ ខែវិច្ឆិកា ឆ្នាំ២០១៧កន្លងមកនេះ ជំទប់ទី១និងក្រុមការងារក៏មិនអាចបំពេញការងារខ្លួនទៅទៀតបានទេ ។ ដូច្នេះហើយរហូតមកដល់ពេលនេះ ភ្នំនោះត្រូវបានឈ្មួញទុច្ចរិត ឃុបឃឹតជាមួយមេឃុំ និងស្មៀនឃុំ បន្តកាយរំលាយយ៉ាងបំពានដោយគ្មានកោតក្រែងអ្វីបន្តិចសោះឡើយ ។ សូម្បីពលរដ្ឋទៅក្បែរភ្នំនោះ ក៏គេមិនឲ្យនៅក្បែរផង ។
***សូមបញ្ជាក់ផងដែរថា ភ្នំដែលត្រូវបានគេកាយរំលាយនោះមានឈ្មោះថា "ភ្នំតាប៉ង់" ជាឈ្មោះដែលអ្នកស្រុកក្បែរនោះតែងតែហៅ ។ វាស្ថិតនៅជិតភ្នំបោះដំបង ដែលក្រុមហ៊ុនចិនវិនិយោគធ្វើស៊ីម៉ងត៍ ដែលមានឈ្មោះថារោងចក្រស៊ីម៉ងត៍ចក្រីទីង ។
អតីតជំទប់ទី១ និងពលរដ្ឋមួយចំនួនធំមានការខកចិត្តយ៉ាងខ្លាំងនៅពេលដែលអាជ្ញាឃុំក្នុងនាមជាអ្នកបម្រើពលរដ្ឋ និងមើលការខុសត្រូវ តែបែរជាចូលដៃចូលជើងជាមួយក្រុមឈ្មួញទុច្ចរិតទៅវិញ ។ អតីតជំទប់ទី១ក៏បានបញ្ជាក់ផងដែរថា កាលពីខ្លួននៅបម្រើការងារជាជំទប់ទី១នោះ គឺមេឃុំ ស្មៀនឃុំមិនហ៊ានធ្វើអ៊ីចឹងសោះឡើយ ។ ដូច្នេះពួកគាត់ទាំងអស់អំពាវនាវ ឲ្យមេឃុំកណ្តោល និងស្មៀនឃុំកណ្តោលបញ្ឈប់អំពើខុសច្បាប់នេះជាបន្ទាន់ ។
ពួកគាត់សូមផ្ញើសារដូច្នេះថា៖
សូមផ្ញើជូនមេឃុំកណ្តោល (ឈ្មោះ ខៀវកន) ស្មៀន (ឈ្មោះ មាស ចន្ធាន) និងមេភូមិភ្នំតូច (ឈ្មោះ ឡាំដេត) នៃស្រុកទឹកឈូ ខេត្តកំពត ។ សូមឲ្យអស់លោក ពិនិត្យនិងបញ្ឈប់សកម្មភាពកាយដីភ្នំខុសច្បាប់ ពីសំណាក់ជនខិលខូច ឬក៏អស់លោកឃុបឃឹតយកលុយពីជនទាំងនោះ ?
---
ខាងក្រោមនេះគឺជាទីតាំងភ្នំដែលពលរដ្ឋហៅថាភ្នំ «តាប៉ង់» ជាដីភ្នំសាធារណៈរបស់រដ្ឋ ដែលត្រូវបានមនុស្សឯកជនមួយក្រុមកាយដីយកទៅលក់ដោយខុសច្បាប់ ព្រមទាំងមានការឃុបឃឹតជាមួយអាជ្ញាធរខាងលើ ។ ភ្នំនេះស្ថិតនៅភូមិភ្នំតូច ឃុំកណ្តោល ស្រុកទឹកឈូ ខេត្តកំពត ដោយខាងត្បូងឆៀងខាងលិចភ្នំបោះដំបង ដែលក្រុមហ៊ុនចិនវិនិយោគផលិតស៊ីម៉ងត៍ ។ ថាភ្នំបោះដំបងទៅចិនវិនិយោគជាមួយរដ្ឋ តែភ្នំខាងក្រោមនេះ គឺជាភ្នំដែលត្រូវបានគេកាយរំលាយយកដី ឬថ្មទៅលក់ដោយក្រុមឯកជនខុសច្បាប់ ដោយគ្មានអាជ្ញាធរណាអើពើសោះឡើយ ។ នៅកំពតមិនមែនមានតែភ្នំនេះមួយនោះទេ តែមានភ្នំច្រើនណាស់ ដែលក្រុមខិលខូចកាយដីភ្នំលក់ដើម្បីផលប្រយោជន៍ផ្ទាល់ខ្លួន ។
ហេតុដូច្នេះហើយ តម្រូវ និងទាមទារឲ្យអាជ្ញាធរខាងលើ ធ្វើការត្រួតពិនិត្យឲ្យបានហ្មត់ចត់ និងត្រូវបញ្ឈប់ជាបន្ទាន់ ដោយមិនត្រូវបណ្តោយឲ្យក្រុមឯងជន មកកាយដីភ្នំដែលជាសម្បត្តិសាធារណៈ ទៅបម្រើប្រយោជន៍ផ្ទាល់ខ្លួនរបស់ក្រុម ឬបុគ្គលណាសោះឡើយ ។ ក្នុងនាមជាមន្ត្រីសាធារណៈ និងមន្ត្រីបម្រើរាស្រ្ត សូមកុំឃុបឃឹតជាមួយជនខិលខូច តែត្រូវតែបម្រើប្រយោជន៍សាធារណៈ និងការពារសម្បត្តិសាធារណៈ ។
បើតាមច្បាប់ភូមិបាល ឆ្នាំ២០០១ មាត្រាទី១៦ ចែងថា៖ ទ្រព្យសម្បត្តិសាធារណៈរបស់រដ្ឋមិនអាចលក់ដូរបានឡើយ ហើយកម្មសិទ្ធិនៃទ្រព្យទាំងនោះមិនអាចកំណត់អាជ្ញាយុកាលបានទេ ។ ម្យ៉ាងវិញទៀត បើតាមច្បាប់ភូមិបាលឆ្នាំ២០០១ ដដែល មាត្រា ២៥៩ ចែងថា ការប៉ះពាល់កម្មសិទ្ធិនៃទ្រព្យសម្បត្តិសាធារណៈ ត្រូវផ្ដន្ទាទោសពិន័យជាប្រាក់ ៥,០០០,០០០ រៀល (ប្រាំលានរៀល) ដល់ ៥០, ០០០,០០០ រៀល (ហាសិបលានរៀល) ឬ /និងផ្ដន្ទាទោសពី ១ ឆ្នាំដល់ ៥ឆ្នាំ ។
***បញ្ជាក់៖ កាលជំនាន់យុវជនចុះវាស់ដី បង្គោលព្រំត្រូវបានគេបោះនៅជើងភ្នំ ព្រោះភ្នំជាសម្បត្តិសាធារណៈ តែឥឡូវបង្គោលនោះត្រូវបានគេយកទៅដាក់លើកំពូលភ្នំ យើងមិនដឹងថាហេតុអ្វីនោះទេ ។
